CIRITA GRAP BA ISI

Kalau nyanda Di Sorga?

Tanta Min, wanita karir musti dia nae pesawat dari satu kota ke kota laeng, karna depe urusan kantor. Somo dekat lapangan terbang dia gelisah, so itu dia jaga bawa Alkitab for baca baca kase tenang depe hati. Dipesawat mo pigi Jakarta ada bapak dudu pa depe sablah, tu so tabiasa jaga nae pesawat .ya.. karna sotabiasa nae pesawat om Racko rupa kurang anggap nae oto Pal dua -Tatelu. Om Racko batanya, "Maaf zes, Apa zes percaya tu ada tulis di alkitab tudia?"

Tanta Min langsung angka suara, "Tantu noh. Ini buku Alkitab nyanda sambarang buku. rupa tu nona sana jaga baca." Tanta Min pe tangan ley batunjuk pa nona di bangku muka rei sablah. Om Racko batanya ley, "Noh bagimana deng Yunus tu ikang paus ada telang?"

Tanta Min manyao, "Oh, Yunus, kita memang samantara baca. Tuangalah jo pa bapak. So pasti kita percaya tudia, itu toh so tatulis di sini." Tanta Min pe jare paka paka pelang depe alkitab.

Om Racko kase trus batanya, "Zes dapa jelaskan bagimana tu Yunus dapa batahang hidop tiga hari tiga malam di dalam puru ikang?"

Tanta Min manyao, "Oh kalo tudia, kita komang nentau. Mar nanti jo kalu kita maso surga kita mo batanya pa Yunus bagimana dia batahang hidop di dalang puru ikang paus.." "Noh kalu Yunus nyanda ada disorga dang?", Om Racko sinis batanya.

"Kalu komang dia nyanda ada disorga, brur jo sandiri tu tanya akang komang!” tanta Min langsung badiam.

Beda cara balia

Ada satu bapa dari Laikit ada kasampatan baku dapa deng malaekat di dekat greja. Dia tainga banya tu dia mo tanya.

"Tuang Malaekat" tu bapa bilang, "Brapa lama so itu satu juta taong?"

Malaekat jawab, "Kalu vor torang di kerajaan sana itu cuma satu menit." Malaekat manyao deng batunjung kaatas

Paitua ley tambah, "Tuang Malaekat, brapa basar so tu satu juta dolar?"

Malaekat manyao, "Kalu vor torang di kerajaan sana, itu cuma satu sen kalu pa ngana."

Paitua ley so nyanda sabar, "Tuang Malaekat, boleh dang kita minta satu sen?"

Malaekat deng senyum manyao, "Boleh noh. Kiapa kong nembole! tunggu sabantar jo, menit brikut, apa tu ngana ada minta kita kase."

Pernikahan dini (kaweng muda)

Di kampung, dekat Laikit Dimembe, Kopo tinggal deng depe orangtua. Pas malam –malam terang bulan, depe mama deng papa di place muka bacirita sadap- sadap kong Kopo kaluar dari dalang rumah.

"Ma! Pa! Kita kaweng jo kwa” Bagitu kopo pe ba pangub pa depe orang tua

"Kopo, Ngana cuma sandiri kong torang paling sayang,ngana bulung boleh kaweng. Apa ngana so nimau badengar pa orang tua?” Kopo pe mama manyao.

"Mar, Ma tape umur so 38 taong tu minggu kalamaring, kiapa nembole kaweng? Napa tu Rony, tanta Doltje pe anak umur 20 so kaweng" Kopo kase jelas depe mau

"Iyo, iyo! Ngana pe kira mama deng papa nentau tudia? Torang kasiang tau itu. Mar, kalu iko mama deng papa pe mau kwa, ngana kwa kase klar tu SMA, baru ngana kaweng!”

Pendeta Gugup

Karna gugup deng so talalu semangat tambah deng baru pasang corong, pendeta muda pe kotbah di gereja dekat rumah, babilang:”Tu murid murid ley langsung kase makang tu lima orang cuma deng lima ribu roti deng dua ribu ikang”

Lengkong, satu jemaat ada ta dudu di bangku blakang takaras bicara pa depe sablah,: “Itu mar nyanda aneh, kita ley dapa beking tudia” sampe satu greja dapa dengar depe suara

Pendeta ley sadar depe keliru. Minggu brikut pendeta ulang depe kata kata,

”Tu murid murid ley langsung kase makang tu lima ribu orang cuma deng lima roti deng dua ikang” Pendeta kase trus depe cirita, batanya:” Bapak Lengkong apa bapak dapa beking?”

"Iyo noh, pak pendeta." Lengkong manyao mantap.

"Kong bagimana cara ngana mo beking tudia?"

"itu minggu lalu pe sisa dang?."