TUA NE MATUARI (hak kesulungan)

TUA NE MATUARI
Dari jaman dulu, ada tatulis di beibel, waktu Ishak pe anak Yakub, Lewat depe maitua Rahel deng sup brenebon deng hasil ada ba we’o tambah deng mantel bulu, tu cirita tentang kesulungan so mulai, kong sampe skarang so dapa tampa di samua keluarga. Riki di beberapa keluarga deng suku tu anak sulung nidia, depe kedudukan ley ada talaeng.
Ini tulisan nyanda mo vor kiapa deng bagimana tu arti dari kesulungan di Alkitab, mar langsung baarah di kata tua ne matuari.
Anak sulung memang katu ada depe istimewa, karna tau jo, tu depe orangtua baru dapa pengalaman pertama selaku orang kong mo beking “hidop” orang. Apalagi kalu tu sulung pe anak tudia cucu pertama ley, oh bukang maen tu nene tete pe sanang. Tagal itu jangan herang kalu di pembagian harta dari tu nene tete, si cucu tua, rupa dapa tampa setelah tu anak bungsu. So itu amper samua anak tua lebe banya dapa perhatian dari depe orang tua. Tambah depe hebat ley kalu didaerah paternalistik, anak laki laki pertama, jadi pembawa nama keluarga dan ‘raja’ di keluarga.
Bagimana di torang pe daerah, Tonsea? Anak laki laki atow parampuang sama saja, depe beda cuma dibabawa nama fam deng tu mo ilang fam. So itu kalu ada orang kaweng, tu keluarga pihak laki laki kase kadow vor tu broit, sebagai tanda kalu si wanita telah menjadi bagian dari tu keluarga laki laki. depe kadow biasanya kobong, kobong pece, pohong kalapa (tu tanah nyanda) dll.
Tua ne matuari, memang dari depe hidop deng depe penghidopan adalah lebe dulu kenal dunia, lebe dulu tau bakarja di kobong, lebe dulu kaweng, lebe dulu punya anak, kong jaga ambe akang contoh vor depe ade ade. Kalu orang tua so nyanda ada kong mo borbage harta, tua nematuari, menjadi pembagi. Mar vor depe keadilan, tu bungsu bapilih lebe dulu. Begitulah kondisi hidop sebelum maso tu ilmu pengetahuan deng teknologi.
Jaman skarang, justru so banya dapa masalah keluarga, antara laeng masalah budel, dll. Yang jaga beking sudara basudara so nyanda baku skeit. Itu anak yang tua barasa depe ade ade so nyanda jaga pake, nyanda dengar, deng so kurang kase sisa kata “dia memang anak yang tua mar mo beking apa deng tu ’tua’ tudia” Ini terjadi karna so ada tu ade lebeh pinter dari tu kaka, tu ade ada taterus depe skolah mar tukaka brenti skolah, tua ade so merantau tu kaka cuma uma wale uma wale, dll. Padal banya tu anak tua brenti skolah karna jaga pigi kobong bantu
bantu orangtua bakarja. Dari tu banya persoalan yang muncul, babeking anak yang tua saat ini, so nyanda salalu jadi tua ne matuari. Kiapa kong bagitu? Karna dari kaka ade itu bisa saja yang tengah, atow tu bungsu yang lebe dari yang tua. Lebe tu bagimana? bisa jadi lebe kaya, lebe pande, lebe gagah, lebe laeng laeng. Mar nyanda samua tu lebe diatas mo beking dia jadi tua ne matuari. karna itu musti ada pengakuan dari samua kaka ade, bukang proklamasi, mar paling penting di dalang hati.
Keretakan basudara kaka ade, seringkali karna tua tetap pertahankan depe kesulungan, sedang tu muda so nyanda parduli.
Kaka ade rupa bagini, dorang so nyanda dapa bersatu, kurang ada tu pertemuan. Kalu kumpul basudara, dorang ada kong bakudapa, mar kalu somo bicara antar keluarga dorang so susah dapa satu suara of bulat tu suara.

Kunci dari mo beking tu kaka ade tetap satu suara, sehingga tua ne matuari ada dan tetap dipertahankan, adalah pengakuan, mengakui kelebihan sudara yang laeng apapun bentuk kelebihannya dan menanggalkan kelebihannya dalam komunitas keluarga. Jangan karna so sarjana kurang dabawa bawa depe sertifikat deng ijasah di kumpulan keluarga, kong depe sudara kurang jaga ba pangge kaka insinyur atow ade doktorandes, dll. Sebaliknya mengakui kekurangan saudaranya satu dengan yang lain. Kalu tu satu ade susah materi, jangan tu sudara laeng hele mo pigi pa depe rumah so nemau, karna depe ade pe rumah cuma sinengking, pende kata so amper samua itong depe untung rugi,dll
So itu depe kunci adalah sadar atau mengakui, deng pake hati/ suara hati, lebe pas dang depe kata tu sobiasa torang dengar yaitu Iman. karna secara ratio/ akal torang musti tau apa tu depe kelemahan deng kekurangan, kong pake tu hati atow deng iman, vor bagimana mo ambe sikap memperlakukan sudara tu kaka of ade, bae dia ada kelebean atow dia tu ada kekurangan. Kalu akui dia pande, torang coba dengar apa dia pe pande tudia, atow harga akang depe kelebean. Kalu akui dia susah, Bantu tu apa torang bisa Bantu. Depe laste sudara basudara dapa hasil tu jaga rasa rasa sandiri depe indah tu kaka ade so “baku mangarti” Dengan cara ini, keluarga menjadi lebe utuh, kong terutama tua ne matuari tetap dilestarikan dan ada satu suara dalam keluarga biar diluar lingkungan keluarga dorang dapa lia tapica pica (BOND)