PAPA PE KADOW

Nyong, memang masih nyong nyong mar somo jadi sarjana. So deng taong dia blajar deng karja tambah rajing iko evanglisasi. Tiga bulan lalu dia bajalang di diManado, kong lia oto bagus deng bodi pe mantap di sorum. Nyong ley suka skali skalian tu oto. Tagal itu Nyong sobabayang abis wisuda pasti depe papa mo bli akang tu oto vor dia. Karna cuma anak sandiri deng depe papa ley masih tamaso di daftar orang ada di kampung. So itu hele depe ontak ley so tapindah tu stel dari ratio taganti deng bahayal jaoh mo pigi pasiar deng tamang tamang, kong Nyong ley so cirita pa depe tamang tudia. Depe oras wisuda klar, Nyong deng mantap badekeng pa depe papa. Nyong pe papa deng senyum mar baciri aermata kong cumu bagimana dia nyanda dapa bilang depe bangga .. kong dia kase kaluar bingkisan dari dalang jas …… mar bukang kunci oto. So tapela kong ancor Nyong pe hati buka tu kadow, adoh!!!!... Alkitab so tulis akang deng tinta warna mas disampul kulit asli. N Y O N G. Nyong langsung spaning deng suara bataria marah” Pa….papa kita tau sayang pa kita, deng samua tu doi harta papa punya, Cuma ni alkitab tu vor kita nidia?!!!!” Nyong banting tu alkitab kong bacabu kaluar kase tinggal depe papa tu so rupa patong, nyanda dapa bacirita, so lebe taancor deng tapela pela depe hati. Nyong, tinggal diManado nemau molia of bale dikampung, bukang cuma bagitu, taong taong lewat, nyong merantau di Jakarta. Karna memang dia pande, deng depe gelar sarjana, itu beking dia jadi sukses, Ada rumah di realestate, deng so kaweng , dapa meitua cantik, kong anak anak ley ada taiko Nyong pe pande pande. Nyong pe papa so sandiri tinggal dikampung, memang tetap katu kaya noh. So dari waktu wisuda tudia, dia nyanda baku dapa deng depe anak. Cuma baharap satu waktu dapa bakudapa kong mobilang bagimana dia pe sayang pa Nyong. Nyong ley kadang jaga batainga depe papa mar dia inga depe emosi tu dulu, dia sakiati deng so jadi tare dendam.Tengari tua kage kage Nyong trima telpon babilang kalu dia pe papa so nyanda ada, so iko pa depe mama di alam baka. Karna cuma Nyong tu anak, Pihak pengacara minta supaya datang ke Manado vor urus tu budel,bendel deng brendel brankas. Karna depe papa pe wasiat so tulis deng jelas kalu tu ahli waris NYONG. Memang ada katu nama laeng mar depe bagean nyanda riki seperempat dari warisan. Oras bajalang maso di kintal rumah, Nyong so sakiati tainga tu dulu dulu. Dia lia satu satu kong dia buka tu brankas pa depe papa pe kamar. Depe buka dapa tu alkitab tu dulu dia ada banting masih ada bungkus deng kertas tu sama deng berapa taong lalu. So baaer depe mata angka tu alkitab kong buka buka tu halaman, kong taberenti dihalaman tu ada pembatas kertas. So ada garis jelas di kata demi kata ayat, Matius 7:11. "Dan kamu yang jahat tahu memberikan yang baik kepada anakmu, masakan Bapa-mu yang di sorga tidak akan memberikan apa yang kamu minta kepada-Nya?" Nyong pe abis baca tulisan tudia, beberapa kunci jatuh dilante, karna ada taselip di sampul kulit alkitab. Nyong punggu kong…. kunci mobil! Di gantungan kunci mobil ada tacetak dealer, sama persis deng dealer oto tu dulu dia suka skali skalian! Nyong buka dihalaman terakhir , dapa STNK dan surat-surat laeng, depe nama tercetak di situ NYONG. Kong ada faktur mobil, depe tanggal satu hari sebelum Nyong Wisuda. Nyong lari pigi garasi, pe buka dia lia ada oto so tatutu deng abu kong pe kotor skali. Mar biar sobagitu nyong tau kalu itu oto memang tu dia suka skali waktu itu. Nyong seka tu kaca lia ke dalam oto, oto masih baru, jok tabungkus deng plastic, kong di atas dashboard ada foto Nyong pe papa ada senyum bangga. Nyong tapalaka dilante dudu, kong manangis nyanda brenti………manyasal tu sojadi kong sonyanda dapa sebale ulang……