TAWENG NEI WE UNED

dari tu lagu Se tedu matuari, ada depe kata kata si taweng nei wee’ uned. Kata kata ini tantu ada depe arti. Taweng adalah bungsu. Nei wee’ = ditempatkan, uned = tengah. Uned boleh jadi depe arti tengah kalu kase jajar atow titik ditengah, kalu depe bentuk lingkaran. Arti dari uned kalu umum balia, taweng dapa lebe perhatian, lebe aman karna ada tu badekeng, lebe kuat karna ada tu mo ba tongka, lebe nyaman karna ada tu mo lelei, deng masih banya tu laeng laeng rasa. Kiapa kong itu taweng depe sudara sudara kase taruh tampa di tengah? Karna itu so dari tete pe nene pe tete pe nene so taturung sampe skarang bagitu depe model. Kalu taru kira, taweng dia tu laste kenal dunia, kalu orang tua pigi kobong, so pesang pa depe anak tu so mangarti,”Jaga ngana pe ade!”, atow kalu tu taweng manangis, tu depe kaka kaka orang tua Tanya akang, ”Kiapa dia!”. So itu lengkali tu taweng kalu nyanda terator ada didik, atow dia sandiri nemau mo ator depe diri sandiri, dia mo jadi kurang mandiri atow tagantong pa depe kaka kaka. Bagimana dang kalu tu taweng keras kepala, nyanda ba dengar depe kaka– kaka? Ini soal laeng, tagantong depe masalah. Karna ada tu taweng so lebe mangarti dari depe kaka kaka. Mar depe umum tu taweng katu jaga dengar no depe kaka kaka pe cirita. kurang dia sandiri tu mo saring, apa tu depe kaka pe cirita tudia boleh dia pake of nyanda. Itu taweng musti tau, kalu dia waktu kacili depe kaka so jaga, lia lia dia barmaen, se mandi, ganti baju, bacuci loyor, dll. Depe kaka tu orang tua jaga suruh. Cuma tu taweng nyanda lia tudia of mangarti karna waktu itu dia bulung kenal deng bulung mangarti depe diri. Karna tu kaka pe sayang jo pa tu taweng, banya katu tu kaka rela nyanda mo trus skolah so pi mancari Bantu orang tua cari makang vor dirumah. Torang tantu banya lia tu kaka kaka berusaha bagimana rupa mo Bantu depe ade vor mo kase trus depe skolah. Laeng cirita ley kalu orang tua ada banya lebe. Lagu se tedu matuari, nyanda dorang harus tiga kong baru tu taweng kase di tengah, dorang banya, ganjil deng genap ley, tetap tu taweng ada di tengah. Karna bagimana kalu taweng kurang, tu kaka tambah akang, kong kalu taweng so talanggar, tu kaka kase inga. Ini vor samua hal. “Tele,! Harta nyanda mo jamin tu basudara, cuma Hati tu dapa !.” (Bond)