Soe deng Mujur

Samua tu ada jaga lia besae dari luar, bisa jadi tu didalang bae bae. Depe bobale komang, Tu jaga lia fasung deng mooy, mar depe sebenarnya ta simpang depe besae skali skalian. Tagal itu, so bijaksana kalu torang kase teru samua tudia pa Tuhan, kong biar jo Dia tu ba ator deng banilai tu masing masing orang pe beking beking, tu mana tu bae deng tu mana besae. Kong torang pe porsi basyukur, kong babeking tu apa tu ada di atoran maen, karna samua jadi bae vor dorang tu mencintai DIA.

Cirita nidia cuma mo kase tambah referensi, kong sapa tu babaca ambe depe kesimpulan masing masing.

Di satu desa di Cina mar pedalaman, ada petani tua pliara satu kuda. Tu kuda tudia jaga bantu pa dia vor ba pigi kobong, ba pajeko, angka angka bahan, dll. Satu hari depe kuda talapas kong ilang so nentau dimana. So itu petani so nyanda karja depe kobong. Oras depe birman birman datang mo bahibor pa dia, dia cuma bilang, "soe ? mujur? Sapa tu mo tau?"

Nyanda bakira satu minggu brikut, depe kuda ada bale sandiri, bukang cuma itu, tu kuda so sama sama deng 7 kuda, tu orang nyanda pliara. Oras itu komang depe birman birman datang kong kase slamat, karna bruntung so tatambah tare depe kuda. Dia ley babilang, "soe ? mujur? Sapa tu mo tau?"

2 hari brikut, depe anak patah kaki ada jatuh dari kuda oras dia mo kase naram tu kuda. Birman birman ley angka suara, kalu tu anak soe skali. Mar vor tu petani, nyanda bagitu, depe tanggapan tetap cuma sama "soe ? mujur? Sapa tu mo tau?"

1 minggu abis depe anak jatuh dari kuda, tentara kerajaan maso di kampung tudia, kong angka samua tu nyong nyong sehat, vor pigi perang kerajaan pe musuh, tu so maso dorang pe wilayah. Pas tentara lia tu petani pe anak hele mo bajalang bulung mampu, dorang tare kase suruh pulang rumah.

Apa itu Mujur?

Apa itu Soe?

Memang katu nyanda ada noh tu tau selaeng DIA

(sumber: de Mello)