CIRITA BAISI

Kelapa.

Samua orang didunia so tau tu kata nidia. Apalagi kalu pa torang di negri “nyiur melambai”, Kata nidia memang top so dari jaman dulu. Ngoni ba kira jo kalu dulu depe harga jual deng depe perdagangan, doi ta kipas kipas, riki anak anak dari tu tuang tuang kopra kalu pekansi, jaga dapa balayar kaluar Manado, pasiar pigi Makasar, Surabaya deng Jakarta Iko deng tu kapal. Jadi, kalu punya kelapa, so pegang doi.

Mar skarang so beda, So ada minyak Klapa sawit, kong orang orang ley so bapikir kalu tu minya goreng babeking kolesterol lengkali nae nae jaha. Tagal itu, Kopra so lebe banya jaga pake vor bahan baku beking sabong, deng kosmetik, dll.

Mar biar katu Kelapa so nyanda primadona depe doi, mar ada depe cara vor mo kase lebe nae depe harga skarang. selaeng kopra, ada tu Minyak murni/ Virgin Oil. Bagitu ley depe aer kelapa, saban bafufu tu aer klapa tabuang buang. Coba tambah modal sadiki kong minta blajar pa penyuluh pertanian bidang agronomis tu cara bagimana ba beking sari kelapa/ nata de coco, ada depe untung laeng dari klapa. Klapa pe gonofu, kalu dipulau Jawa so sadiki mar, dorang jaga beking mulai dari keset kaki, matras, jok oto, sofa, sampe di tampa tidor/ bolsak. Depe tampurung, jaga pake vor bahan baker rumah rangga deng vor beking karbon tu depe arang. Depe kraskas, ambe depe batang kong beking sapu lidi. itu depe nilai ekonomis ja beking batambah bae vor tu diri sandiri, keluarga deng pemerentah kalu torang urus bae bae tu klapa tudia. Jadi, biar dang so nyanda rupa dulu tu bakipas kipas doi kopra, mar kalu beking butul, paling kacili so tasadia lapangan kerja deng so ada usaha kecil.(kiriman BM:Bekasi)

KASTA DUNIA

1. Jaga dapa lia, nyanda jaga hidop, cuma babagitu, nyanda jaga ba pindah, nyanda jaga bapikir, depe nama BATU

2. Jaga dapa lia, kong jaga hidop, ba jadi besar, nyanda jaga ba pindah, nyanda jaga bapikir, depe nama POHONG

3. Jaga dapa lia, kong jaga hidop, ba jadi besar, kong jaga ba pindah, nyanda jaga bapikir, depe nama BINATANG

4. Jaga dapa lia, kong jaga hidop, ba jadi besar, kong jaga bapindah, jaga ba pikir, depe nama Manusia

· Kepala batu depe arti sama deng?..........

· Kalo manusia nyanda jaga pake depe ontak dang sama jo deng tu mana?....

Kiriman: BM (Bekasi)

Oto Mancari

Sa’ nyaku rumeken reken u lalan pinakelanganku tanu oras kaserit endo yaai, mewewawai neen ko!, pasu rumae. Dei tanu ungkawii. Eleken lako se tou mateitei rimembong malelowa mesesake noto mancari.

Nyaku tubeitei wo mingka witu pepenet wo sumangkong man, mange mena um pa’apa’ayangan. Rungker ereh wo u dambung mina krumbu mo tare. Ni’itu tele!, dei kampe dimaok aki kantor, eleken tanu mokan tare si mawuri nekasuai yo ma’ayang.

Sa’ mena mbanua, daket se mikro dei siapa tou simake. Oras man wo’ondo sia vol, oras wadina U noto malelowa maento se tou. Maan sia mena pe aki plein, taan sa sia simaduy, to’on’to’on ni maewa noto, akat si rempe wo diwaghan sa si tou yaai sumake.

Sa’ tumadinga kekentaren, mbeya mo noto nenaan no teip. Yo,, kareo tantu, tanu sakita tumou club disco sa wia Jakarta.

Ni’itu mo se’ polisi ma’ator u noto mancari wo sera dei mesesioan tambak u mepedunteng tadinga

Kuramo sa’ kita meilek se ojek. Nyana kweiten sio mo mena mbanua. Sa mange wo mawuri uma man, sumake mo ojek u rewek, kinakurangan u wendu kumoyau wo mapacol. (BOND)

PANGTOWO

Ada satu bapak dari Manado ada kasampatan datang Jakarta, mar katu dia waktu dikampung so dengar kalu orang jakarta pangtowo skali. Dia ley pegang tu kata kata karna dia dengar langsung dari orang tu so pernah datang ke Jakarta. Di Metropolitan, Peto bilang pa depe sudara, kalu mo ba pasiar cari tau tu jalang jalang deng mo lia pemandangan. Peto nae bis jurusan Cilitan Tg.Priok, brani deng stel abis, dia moturung di Rawamangun, kenek babataria vor orang mo turung, ”kiri duluan, kiri duluan” depe maksud kase inga penumpang turun kaki kiri tu injak di aspal lebe dulu, karna so bagitu depe kenyataan, oto masih bajalang orang so nae of turung. beda deng di Manado, oto brenti butul vor tu penumpang. Penumpang adalah raja. Peto pas mo turung dia tainga, tu kata kata orang Jakarta pangtowo dia ley bapikir:”iyo kote kang, nembole iko apa tu kenek da bilang” Peto ambe kesimpulan, kong bis masih bajalang, dia turung deng kaki kanan. Lia jo, Peto malintuang pica pica, untung nyanda taguling pigi diban. Orang orang takumpul, lia bakasiang, deng bakio. Ada tu nyong orang Tonsea taru taru kira. Peto paksa diri mo badiri, se ilang malo deng saki, kong bicara:”So ta pe oras komang nidia noh!, hele so pake kaki kanan bagini rupa, bagimana kalu iko tu kenek, lebe soe tu ada jadi pakita.” Nyong Tonsea, cuma senyum kong kele pa Peto, kase dudu dekat halte. Kiriman: Charles Audy

PONGO

Jhon so nyanda tahan pigi pa dokter babilang depe meitua so nyanda badengar, so korslet, somo pongo.

“So bagimana so depe pongo tudia?” dokter batanya .

“Nentau komang kita dok!, mar depe pasti kita musti bataria kalu mo bicara deng dia” Jhon kase jelas.

“Iyo dang, kalu bagitu ngana beking nidia, kong kita modapa depe sebab tu depe pongoh tudia. Ngana badiri 6 meter dari meitua, kong bilang apa apa pa dia. Kalu dia nyanda manyao, ngana badekat 4 meter kong ulang tu cirita. Kalu ngana pe meitua nyanda dengar ley, ngana lebe badekat 2 meter kong ulang tu cirita. Kalu dia bulung dengar, lebe badekat. Jhon babale pulang rumah. Masih di pintu muka, Jhon so dapa ciong tu sadap tinoransak blanga. Jhon badekat lia meitua samantara mangada tu rumping di dodika.Jhon ator depe jaoh kira kira 6 meter kong bilang deng suara karas,”Ngana momasa apa,Len?” nyanda dapa jo tu jawaban. Jhon maju badekat 4 meter kira kira,” Ngana momasa apa kang? ”Nyanda ada ley tu Jhon jaga tunggu. Jhon badekat 2 meter kong ulang mar, sama jo dia nyanda dapa jawaban. Laste Jhon batempel, kong stengah karas ulang depe cirita. Len, Jhon pe meitua babale badan kong bamata basar deng baveto ukur tobat,” Vor kaampa kali kita ulang, Ti..no..ran..sak..bla..nga..!” Kong deng sondo Lena bage Jhon pe tangan, karna pastiu ada dengar depe peitua pe bataria,tu riki birman so basosere akang.

Lebe gampang balia orang pe salah.... bukang tu diri sandiri pe salah...

SAMA UMUR

Linda dari Tatelu, Nyong orang Laikit Dimembe, ba skolah di satu tampa. Depe poko dang, Nyong pe ser ser pa Linda, so sampe proklamasi. Dorang dua so batona. Biar cuma ada bakujadi di kantin skolah SMU Dimembe, di bawah pohon mangga telor deng pohon kalapa, mar katu dorang pe cirita kisah kasih di sekolah ada taterus mulus sampe dorang so klar kong dapa ijasah.

Linda pe orang tua katu, kabratan deng dorang pe anak pe calon nidia. Karna selaeng beda tu jaga maso basombayang akang, Nyong cuma pegawai honor di pemda Minahasa Utara, deng Nyong pe orang tua cuma tukang nae kalapa kong depe mama tukang bubaso. Mar tau jo! Kalu so cirita hati, rupa tu lagu, biar Linda di lautan api, Nyong pigi kendati dia musti mati.

“Om deng tanta, kitorang dua deng Linda, so baku baku sayang, torang dua mo kaweng” Nyong brenti kong deng tegas,” Tempo apa torang dua boleh kaweng, nanti kita pe orang tua datang, ba maso minta”

Linda pe papa so pasti nyanda iyo. Mar, vor mo trus trang dia inga depe anak Linda.”Bagini, kasiang Nyong, nanti jo, ngana batunggu depe waktu yang pas. Skarang kita pe anak umur 21, kong ngana 25, jadi basabar jo sampe ngoni dua pe umur so sama” Linda pe papa badiri, maso kamar.